Аналоговые системы

Икос 10

Стена и твердое ограждение града Твери и обители твоея явился еси святителю отче Арсение. Егда бо лютии и злоправнии литвины, разоряюще грады и веси российския, доидоша до обители твоея, и восхотевша оную расхитити, взяша покров со святых и многоцелебных мощей твоих, златом и серебром украшенный, имже един от них дерзну покрыти коня своего, но абие на высоту вземшеся и оба падоша мертвы, покрыв же си­лою Божиею обретеся на Кресте верху Храма Твоего, прочие же, великим объяти страхом бежаша, оставльше обитель твою и град Тверь невредимы.

Поминающе убо сие чудное твое заступление, радостно взы­ваем к тебе:

Радуйся, избранный воеводо, присно готовый отражати вра­ги видимыя и невидимыя от паствы твоея земныя.

Радуйся, града Твери и обители твоя забрало несокрушимое.

Радуйся, щите защищаяй верныя.

Радуйся, стено ограждающая благочестивый.

Радуйся, яко не попустил еси бисеру святыни попрану быти.

Радуйся, яко прогнал еси диких вепрей винограда Христова.

Радуйся, яко святую обитель твою нерасхищену от врагов сохранил еси.

Радуйся, яко православный град Отечествия твоего невреди­мым соблюл еси.

Радуйся, во бранях Христолюбивому воинству великий пособниче.

Радуйся, подвизающимся в посте и безмолвии добрый поспешниче.

Радуйся, недужных благодатный целебниче.

Радуйся, святителю Арсение, усердный молитенниче о ду­шах наших.

Кондак 11

Пение хвалебное со ангельскими чины и всеми святыми носиши горе у Престола Божия, святый отче наш Арсение, и тамо наслаждаяся блаженства неизреченнаго, не престаеши милостивно призирати на паству твою земную, на град Тверь и на обитель твою. Зриши бо наши скорби и нужды, болезнующи о наших немощех и гресех, и тепле молищися о всех нас ко Господу, подвизая и нас недостойных во умилении глубоцем пети Ему: Аллилуиа.

Икос 11

Светильник светозарный был еси, святителю Христов Арсе­ние, в жизни земней, светивый пастве твоей словом учения и примером святаго жития твоего, но и ныне, по смерти твоей, не престаеши просвещати нас чудесы твоими и нетлением чесных мощей твоих, наипаче же святыми и богоприятными мо­литвами твоими имиже ограждаеми, невредимы от всякаго зла пребываем и глаголем:

Радуйся, избранниче Божий, егоже молитва много может пред благосердием Владыки.

Радуйся, Архиерею Господень, чудне подражавый в житии и великому Архиерею Иисусу Христу.

Радуйся, слуго Всевышняго разноангельный.

Радуйся, яко кончина твоя славна и успение во святых.

Радуйся, осиянный в горних обителех славою света невечер­няго.