|
Радуйся, пастыре наш и учителю. Радуйся, теплый о нас грешных пред Богом предстателю. Радуйся, умиротворивый в пастве твоей раздоры и нестроения. Радуйся, бодренными твоими молитвами посрамивый врага спасения человеческаго. Радуйся, православия и благочестия насадителю. Радуйся, лжи и всякого нечестия истребителю. Радуйся, Христу уневестивый многия души человеческия. Радуйся, руководивый в Царствие Небесное твоя ученики Радуйся, добрый и несыпный делателю винограда Христова. Радуйся, мудрый и Богоприятный строителю тайн Божиих. Радуйся, иерарше всеблагий. Радуйся, архиерей пречудный. Радуйся, святителю Арсение, усердный молитвенниче о душах наших. Хотением возжелал еси, святителю отче Арсение, имети в пастве твоей подобие святыя лавры Киево-Печерския, тем же устроил еси близь града Твери обитель во честнаго Успения Пресвятыя Богородицы и преподобных отец Антония и Феодосия Печерских, идеже сонм иноков благоговейных собрал еси мудре, и научил еси их словам и благим примером твоим в преподобии и святыни пети Богу: Аллилуиа. Новосозданная тобою обитель яко виноград духовный явися, святителю богомудре его же возделал еси трудолюбие, братию твою назидая к подвигам послушническим и ко всякому добро-деланию, да будут совершени и непорочни и да возносят немолчныя хвалы Христу Богу, о сем по долгу тя величаем и зовем: Радуйся, иноков любителю. Радуйся, добрый наставниче подвизающимся во брани духовной. Радуйся, верный руководителю шествующих ко Господу путем тесным иноческаго жития. Радуйся, мудрый учителю христианскаго совершенства. Радуйся, лествице, возводящая богомудрых иноков на высоту совершенства духовнаго. Радуйся, в подвизех неутомимый. Радуйся, на престоле святительстем житие иноческое проводивый. Радуйся, Храм Божий чудный, во имя Пресвятыя Богоматере, во обители твоей создавый. Радуйся, и себе самого храм одушевленный сотворивый Триипостасному Богу. Радуйся, всенощныя молитвы и бдения всеусердно совершавый. Радуйся, преподобнии руце свои со многим дерзновением к Богу воздвизавый. Радуйся, еще при жизни твоей даром чудес обогащенный. Радуйся, святой Арсение, усердный молитвенниче о душах, наших. Странника и пришельца к жизни сей скоротечней помышляя себе быти отче наш Арсение, гроб руками своима из камене устроил еси, и под ним горце плакал еси, помышляя смерть и суд Божий нелицеприятный и грозный всякому земнородному. Темже и нас воздвигни от сна греховнаго, да подражаем плачу твоему умиленному, и покаянием очистившися от всякия злобы, сподобимся купно с тобою на небеси взывати Создателю нашему: Аллилуиа. — 44 —
|